Skënderbeu dhe Partizani kanë bërë detyrën në përballjet respektive me Kastriotin dhe Kamzën duke fituar tre pikët e radhës. Të kuqtë janë kthyer te fitorja pas një jave zhgënjyese që patën në shtëpi ndaj korçarëve të cilët u morën edhe vendin e parë në klasifikim.
Partizani luan mjaft mirë në pjesën e parë ndaj Kamzës duke dominuar takimin, por porta mbetet e paprekur. Menjëherë në fillim të fraksionit të dytë ka qenë Telushi ai që ka kaluar në avantazh “Demat e Kuq”.
Pas një goditje këndi, me kokë mesfushori goditi, por portieri Avdyli priti gjithçka. Më pas, topi shkoi sërish te ai dhe shumë pranë vijës fatale, nuk fali. Ndërsa skuadra e vendit të parafundit pati një rast të shkëlqyer, pasi Frashëri goditi nga jashtë zonë, por topi mbeti vetëm në shtyllë, teksa Hoxha i shtangur. Megjithatë, me këto shifra, Kamza mbetet në zonën e ftohtë dhe Partizani me një pikë larg kreut, korçarët komandojnë.
Pra edhe Skënderbeu nuk di të ndalet në kampionat, teksa ka hipotekuar fitoren e radhës, kësaj herë përballë Kastriotit që ndodhet në vendin e fundit, por me rezultatin 1-0. Ai që i dha fitoren Skënderbeut ishte Gjergji Muzaka, i cili shënoi me kokë.
Pas kombinimit të Bregut me Abazin, ky i fundit gjeti Muzakën në zonë, që me një goditje mjeshtërore me kokë përshëndeti rrjetën. Kampionat mbajnë kreun, ndërsa krutanët mbetën në fund të klasifikimit.
