Ndarja nga jeta e presidentit të FFK-së, Fadil Vokrri ka tronditur mbarë opinionin sportiv. Të gjithë që e njihnin legjendën e futbollist kosovar kanë shkruar në nderim të tij dhe nuk mund të mungonte ekipi serb i Partizanit të Beogradit. Me këta të fundit Vokrri ka luajtur 3 sezone, ku në 107 ndeshje ka shënuar plot 47 gola dhe ka fituar disa trofe të rëndësishëm.
Ndarja nga jeta e tij, ka prekur klubin serb, të cilët nëpërmjet një postimi në rrjetin social “Facebook”, kanë shprehur ngushëllimet e tyre për Vokrrin, duke bërë edhe një përmbledhje të karrierës së tij. Ajo që bie në sy më shumë janë komentet pozitive të tifozëve serbë në drejtim të Vokrrit, të cilët e konsiderojnë një legjendë duke i bërë vlerësimet mbi atë që dha në futboll dhe jo mbi origjinën e tij.
“Sot, në moshën 57-vjeçare, është ndarë nga jeta për shkak të një ataku kardiak, ish-futbollisti i Partizanit të Beogradit dhe kombëtares së ish-Jugosllavisë. Ai ka lindur më 23 qershor, 1960 në Podujevë.
Vokrri e nisi karrierën si futbollist në Podujevë dhe në vitin 1980, ai kaloi te Prishtina ku luajti për 6 sezone. Për Partizanin, Vokrri luajti në vitet 1986-1989, duke zhvilluar 107 ndeshje dhe shënuar 47 gola. Ai ka fituar titullin kampion në sezonin 86-87’. Më pas luajti me Fenerbahçen dhe karrierën e përfundoi në Francë.
Tifozët e partizanit nuk kishin rezerva, sepse ai ishte një futboll i nivelit të lartë, një luftëtar pa kompromis në fushë dhe cilësitë e tij njerëzore lanë një gjurmë të thellë për Partizanin. Fadil, prehu në paqe dhe lëre lavdinë tënde të vlerësohet dhe të faleminderit”, shkruhej mes të tjerash në postim.
Klubi i Partizanit ka cituar edhe një prononcim, të cilin Vokrri e ka dhënë ku ka vlerësuar maksimalisht klubin serb dhe tifozerinë e tij. “Janë tre vitet më të mira të karrierës sime. Unë kurrë nuk do të jem në gjendje t’i harroj ata. I kam uruar Partizanit gjithë të mirat. Kam menduar për Partizanin që para se të vija në Beograd dhe kujtimet atje i kisha më të mira nga sa i kisha menduar”, shprehej Vokrri.
