Pas vendimit të KAS skuadrat që kanë buzëqeshur ishin Kukësi dhe Partizani. Gjykata Arbitrazhe e Lozanës ka hedhur poshtë kërkesën e Skënderbeut për pezullimin e përkohshëm të vendimeve të UEFA-s që do ti lejonte korçarëve të merrnin pjesë në “Champions League”.
Si rrjedhojë Kukësi do të luajë në këtë kompeticion dhe Partizani në “Europa League”. Kukësi ka dalë në një deklaratë zyrtare ku konfirmon pjesëmarrjen në Champions League dhe shpreh keqardhje për dënimin që mori Skënderbeu.
Klubi kryeqytetas me një postim në rrjet sociale njofton tifozët për vendimin si dhe bën të ditur datën se kur do të nisin përgatitjet për këtë kompeticion.
ZYRTARE
FK PARTIZANI PJESË E EUROPA LEAGUE 2018/2019
15-të herë kampionët e vendit janë pjesë e Europa League për sezonin 2018/2019. Pas përfshirjes nga ana e UEFA-s të FK Partizanit në ekipet të cilat do të marrin pjesë në këtë kompeticion, efektet e vendimit të KAS konfirmojnë zyrtarisht dhe në mënyrë përfundimtare të kuqtë si pjesmarrës në UEL.
Skuadra do të nis të premten datë 15 Qershor përgatitjet në prag të përfaqësimit në turin e parë të kompeticionit europian. Ndërkohë në 20 Qershor, datë kur do të hidhet edhe shorti në Nion, do të mësohet edhe kundërshtari që skuadra do të ballafaqohet në këtë edicion europian.
#PërjetMeTyPartizan
