Kreu i PD-së Basha, thotë se krijimi i partive të reja nga figura politike të formuara nga PD nuk kanë dalë nga kjo parti, pasi Rama i ka krijuar prej panikut. Në emisionin “Real Story”, teksa komentoi procesin e zgjedhjes së kandidatëve brenda PD, tha se ai është një proces vlerash dhe lajm i mirë për demokracinë shqiptare. Kryemokrati shtoi më tej se në 25 prill do të largohet e keqja, nga ku do të fillojë ndryshimi.
“E rëndësishme është që të gjithë po vlerësojnë si një proces vlerash. Është lajm i mirë për demokracinë shqiptare. Është premtimi im. Bëmë ndryshimet statutore, me ndihmën e partnerëve tanë planifikuam si do bëhej. Merita i takon demokratëve shqiptarë që u investuan edhe në propozime, edhe në votime.
Është bërë dhe punë. Vendimmarrja merret nga Kryesia dhe Këshilli Kombëtar. Që është një proces vlerash është edhe nga kundërshtarët.
Siç ka nisur, do mbarojë, dhe do jetë një shkallare që do demonstrojë para qytetarëve një qasje të re në politikë në administrim dhe llogaridhënie. Qëndrimet e mia janë të qartë, s’ka parti të dala nga PD, janë të dala nga paniku i Ramës. Më 25 prill largohet e keqja, s’mund të nisë ndryshimi pa u larguar e keqja”, tha Basha.
