Prokuroria e Posaçme Kundër Krimit të Organizuar dhe Korrupsionit kërkoi një ditë më parë autorizimin e Kuvendit për arrestimin e deputetit të PS-së, Alqi Bllako. Ky i fundit akuzohet si i përfshirë në aferat e inceneratorëve. Sipas SPAK, hetimet ndaj Alqi Bllakos janë regjistruar si i dyshuar për kryerjen e veprave penale “shpërdorim i detyrës”, në bashkëpunim, dhe “korrupsion pasiv i funksionarëve të lartë shtetërorë ose i të zgjedhurve vendorë”, të parashikuara nga nenet 248, 25 dhe 260 të Kodit Penal”. Lidhur me këtë çështje, një reagim të menjëhershmëm pati edhe kryetarja e LSI-së, Minika Kryemadhi, e cila në një deklaratë të jashtëzakonshme për mediat tha se shumë shpejt do të nxjerrë fakte të tjera të rënda. Po dje, në një intervistë për emisionin “Now”, Kryemadhi ka deklaruar se dy kompani në Maltë të lidhura me inceneratorët, kanë sjellë para që janë përdorur për të blerë votat në zgjedhjet e 25 prillit në Durrës. Ajo ka shtuar më tej se paratë kanë ardhur po ashtu nga porti i Durrësit, njëjtë si me rastin e “Toyoya Yaris”.
PJESË NGA INTERVISTA:
Ju keni thënë sot që do të keni dokumenta të tjera që do t’i denonconi. Për çfarë bëhet fjalë?
“Bëhet fjalë për dy kompani në Maltë. Njëra kompani është regjistruar në emër të Mirel Mërtirit”.
Pra kanë patur kompani off shore atje?
“Dhe kompania tjetër është kompania që janë të përfshira të gjitha kompanitë shqiptare që janë të lidhura me inceneratorët. Pra një kompani off shore në Maltë, e cila mbledh të gjithë skemën e të gjithë kompanive që janë të përfshira. Ndërkohë në dijeninë tonë, kompanitë e Mirel Mërtirit dhe Klodian Zotos përveç Zimbabves kanë disa kontrata të nënshkruara nëpëmjet lidhjeve të tyre politike në Bagdat, Irak dhe në Tunizi që përsëri janë kontrata të dyshimta që janë në funksion të pastrimit të parave”.
Dakord, po si i kanë investuar këto para në fushatë elektorale në kontot e kujt kanë xhiruar këto para?
“Nuk janë xhiruar në konto por kanë ardhur kesh në Portin e Durrësit siç erdhën ato të Belgjikës nëse e mbani mend. Por kanë ardhur nga Malta. Sigurisht që partnerët ndërkombëtarë kanë dijeni për to dhe sigurisht aty ku ka sy dhe veshë, ka një regjistrim të lëvizjes së parave”.
