Gjatë mbledhjes së grupit parlamentar, kryetari i Partisë Demokratike, Sali Berisha, paralajmëroi se dita e nesërme do të jetë betejë e fuqishme parlamentare. Kryetari i PD-së, Sali Berisha ka zbuluar skenarin që opozita do të zbatojë të enjten e 24 nëntorit në Kuvend, ku do të diskutohet mbi marrëveshjen aq shumë të kontestuar për Portin e Durrësit. Ai paralajmëroi se nuk do të njohin bllokim të fjalës në Kuvend, dhe tha se beteja parlamentare do jetë shumë e ashpër. Ndër të tjera, Berisha citoi se deputetët duhet të jenë të përgatitur për të mbrojtur interesat e qytetarëve.
“E ka vu cështje të parë në rend dite. Ne do qendrojmë me forcën më të madhe të fjalës, do përpiqen të na bllokojnë, nuk njohim bllokim më në Parlament se ai ka një urrejtje patologjike për fjalën, opozitën.
Ndaj dhe parashikohet një betejë parlamentare shumë e fortë, shumë e fuqishme. Duhet të mbrojmë me vendosërinë më të madhe interesat e qytetarëve shqiptarë te buxheti, të qytetarëve të Durrësit te Porti i Durrësit”.
Kryeministri Rama ka paralajmëruar se do jetë i pranishëm në Kuvend, për të dhënë sqarimet e nevojshme lidhur me këtë marrëveshje.
“Nesër e kemi një ditë shumë të rëndësishme në Parlament, duhet të përgatitemi me gjithë mundësitë tona të mbrojmë interesin publik se kurrë këto nuk janë imagjinuar se mund të ndodhin. Nuk është paraqitur asnjëherë një marrëveshje plackitëse”, përfundoi Berisha.
