Kryeministri italian duket se është i kënaqur me sjelljen e popullatës ndaj distancimit fizik, referuar masave për koronavirusin. Giuseppe Conte ka deklaruar në një intervistë për gazetën ‘Il Fatto Quotidiano’, se nëse italianët vijojnë kështu, infeksioni do të përmbahet. Duke monitoruar situatën, kryeministri është shprehur se italianët janë treguar të përgjegjshëm. Ai është optimist se në ditët e ardhshme, gjërat do të funksionojnë mirë.
“Objektivi i parë i kësaj faze 2 ishte të kuptonte nëse italianët do ti përmbaheshin indikacioneve të sigurisë.
Dy ditët e para të rifillimit, treguan Italinë në pjesën më të madhe të vetëdijshme dhe të përgjegjshme, e cila tregon se edhe në ditët e ardhshme gjërat do të funksionojnë mirë.
Në fakt, nëse infeksionet nuk shkojnë lart, do të jetë e mundur të bëhen rihapje të tjera më herët nga sa kemi parashikuar”, tha kryeministri Conte.
Në datën 4 maj, Italia hyri zyrtarisht në fazën 2 të pandemisë. Vlerësohet se rreth 65 % e italianëve janë rikthyer në punë.
Sipas dekretit të qeverisë, nga data 18 maj do të rihapen dyqanet dhe muzeumët, kurse baret dhe restorantet do duhet të presin deri më 1 qershor.
