Ditën e sotme është mbledhur Komiteti Drejtues Kombëtar i Lëvizjes Socialiste për Integrim, i cili është hapur nga kryetarja e kësaj partie, Monika Kryemadhi.
Gjatë fjalës së saj, deputetja e LSI e quajti Ramën një të sëmurë psiqik, i cili ka bllokuar Reformën në Drejtësi.
“Kjo mbledhje është jashtë radhë dhe kjo vjen për shkak të situatës në të cilën ndodhemi. Vjen nga arroganca e një kryeministri i cili ka futur mazhorancën të luajë në fushën e krimit, po kërkon të fusë edhe Parlamentin në parajsën kriminale të ndërtuar nga vetë ai. Kjo mazhorancë e drejtuar nga Edi Rama ka bllokuar Reformën në Drejtësi,” tha Kryemadhi.
Po ashtu, Kryemadhi u kërkoi falje të gjitha votuesve, teksa tha se qeverinë Rama duhej ta kishte rrëzuar kur LSI ishte në bashkëkoalicion me PS-në.
Mbledhja vjen një ditë para protestës së opozitës, kundër zgjedhjes së prokurorit të përgjithshëm të përkohshëm, ku LSI do të kërkojë në Kuvend që të respektohet Kushtetuta për kryeprokurorin dhe më pas deputetët e LSI do t’i bashkohen protestës.
Kryemadhi tha se nuk do të lejojnë që Rama të kapë drejtësinë, teksa u shpreh se nuk do të lejohet zgjedhja e Kryeprokurorit të Përkohshëm, ndërsa shtoi se e vetmja rrugë është të reagojmë me të gjitha mënyrat demokratike.
“Jemi shumë të qartë të mos e lejojmë nesër këtë proces në seancë. Ky njeri e ka futur mazhorancën të luajë në fushën e krimit. Frika dhe ankthi që ka Tahiri e çon drejt uzurpimit të institucioneve të drejtësisë. Për LSI, Prokurori i Përgjithshëm nuk është çështje emrash. Nuk i kemi dhënë votat për reformën në drejtësi për një grup oligarkësh. Arroganca e kryeministrit ka kaluar çdo kufij institucional e njerëzor. E ka kthyer këtë vend në një bazë të krimit, terrorit dhe të korrupsionit”, u shpreh Monika Kryemadhi.
“Të gjithë nesër të jemi para Kuvendit në orën 9 për t’i treguar këtij kryeministri lolo se koha e tij mbaroi. Ora e tij ka ardhur jo prej opozitës, por për shkak të urrejtjes që qytetarët kanë për të”, tha ndër të tjera Kryemadhi.
