Degët më të preferuara për të rinjtë në Kosovë janë Fakulteti i Edukimit, Fakulteti Ekonomik, Juridik dhe ai i Mjekësisë.
Por, sipas ekspertëve kjo përzgjedhjeve e profileve në universitet duhet të ndryshohet në varësi të kërkesave të tregut të punës.
Sipas ekspertëve të çështjeve të arsimit dhe përfaqësues të bizneseve, tregu i punës kërkon edhe këto profesione, por që janë të tjerat ato që kërkohen më shumë.
“Këtu në Kosovë mungojnë politikat e zhvillimit të sistemit të arsimit dhe pranimit të studentëve, me këto politika nuk favorizohen ato vende pune, ato profile arsimore që i kërkon tregu, por bëhen në bazë të interesimit të nxënësve, të cilat kryesisht janë në shkencat humane ku edhe procesi i tyre është më i lehtë”, thekson eksperti i çështjeve të arsimit, Halim Hyseni.
Numri i studentëve në Universitetin e Prishtinës ka shënuar rritje nga viti në vit. Aktualisht në këtë universitet studiojnë më shumë se 45 mijë studentë, ndërsa numri i studentëve që do të pranohen në shtatë universitetet publike në Kosovë për vitin akademik 2017/2018 është 15.255 studentë.
Berat Rukiqi, ekonomist në Odën Ekonomike të Kosovës, thotë për Radion Evropa e Lirë se ajo që ofrohet brenda universiteteve publike dhe private, duhet të jetë e reformuar, pasi që programet aktuale nuk mundësojë që të rinjtë të pajisen me aftësitë që adresojnë nevojat e punës.
“Ajo që po shohim tani është vazhdim i trendit të kaluar. Një numër i madh i atyre që përfundojnë shkollën e mesme domosdo shkojnë në fakultete publike dhe private, duke mos analizuar të ardhmen dhe duke mos pasur mundësinë që të kenë një vlerësim apo alternativ që në një të ardhme të afërt të sigurojnë edhe një vend pune”, thotë Rukiqi.
Në Kosovë, sipas përfaqësuesve të bizneseve, pritet që në të ardhmen e afërt të krijohen vende pune në sektorin e industrisë së përpunimit të ushqimit, minierave dhe minerareve, energjetikës dhe se orientimi i të rinjve do të duhej të bëhet në këto profile.
“Kemi një lëvizje drejt aftësive që janë më pak të lidhur më shkencat sociale drejt atyre që janë me vet zbatimin e pjesëve të ndryshme që lidhen me prodhim, aftësi inxhinerike, më shumë kërkojnë duar të vyeshme dhe njerëz që janë në gjendje të përcjellin teknologjitë e reja dhe zbatimin e teknologjive të reja”, shton Rukiqi.
Papunësia në Kosovë, sipas të dhënave të fundit të Agjencisë së Statistikave të Kosovës, është 28.7 për qind.
