Kuqezinjtë janë gati për provën e parë miqësore për vitin 2018. Djemtë e Panuccit kanë kryer seancën e fundit stërvitore dhe idetë e trajnerit për formacionin anti-Norvegji duken të qarta. Moduli që do të aplikohet në këtë ndeshje është ndryshe nga jemi mësuar të shohim, do të kemi një Shqipëri sulmuese të rreshtuar në 4-3-3.
Në portë do të jetë Strakosha dhe jo Berisha, kjo një zgjedhje për të mos rrezikuar, pasi portieri i Atalantës nuk ka qenë në formën më të mirë në ditët e fundit. Në repartin e mbrojtjes pritet të ketë risi, me Hysajn që ka blinduar krahun e djathtë dhe nuk ka konkurrentë. Ndërsa qendra e mbrojtjes ka një balotazh mes Gjimshitit dhe Ajetit, pasi ky i fundit është parë në seancën e fundit me jelekun jeshil të titullarit, garë e fortë për të siguruar një vend përkrah Mavrajt. Ndërsa në të majtë duket më favorit mbrojtësi nga Kumanova, Naser Aliji para Lenjanit.
Konfirmohet Ramadani në qendër të mesfushës, një test i rëndësishëm ky për ish futbollistin e Partizanit në një debutim prej titullari në kombëtare, ndërkohë që përkrah tij siç edhe ishte paralajmëruar do të jenë Taulant Xhaka dhe Kamer Qaka.
Edhe në fazën sulmuese pritet të ketë ndryshime, Armando Sadiku edhe pse e kishte të siguruar deri dje vendin e titullarit, Panucci ka vendosur që kundër Norvegjisë ta nisë nga stoli, në vendin e tij pritet të jetë njëri mes Cikalleshit dhe Balajt. Krahët e sulmit nuk do të ndryshojnë, është Eros Grezda dhe kapiteni Odise Roshi që kanë siguruar ato pozicione.
Është kjo Shqipëria që pritet të zbresë në fushë sonte në Elbasan Arena, në sulm për të konfirmuar progresin drejt objektivave të rëndësishëm, Nations League dhe eliminatoret e Euro 2020.
