Kryeministri i Polonisë, Mateusz Morawiecki, ka çuditur me deklaratën e tij teksa ka thënë se koronavirusi është bërë një sëmundje si “të gjitha tjerat”. Ai ka shtuar më tej se s’ka asgjë për tu shokuar, e ndërsa janë në pritje të një vaksine për ti dhënë fund pandemisë.
“Kjo është tani një sëmundje për të cilën mund të themi se është si çdo tjetër. Ne vetëm po presim vaksinën”, citoi agjencia shtetërore e lajmeve PAP, Morawieckin.
Polonia me rreth 38 milionë banorë, ka konfirmuar mbi 35.000 raste me koronavirus dhe 1.492 viktima.
Reagimi i tij vjen pas qetësimit të qytetarëve për zgjedhjet. Ai ka apeluar ndaj polakëve që të mos kenë frikë, të votojnë në rrethin e dytë të zgjedhjeve presidenciale më 12 korrik.
“Institucionet që kanë vlerësuar raundin e parë (të zgjedhjeve), kanë konfirmuar se ai është organizuar në një mënyrë shumë të përshtatshme. Le të mos kemi frikë të marrim pjesë në raundin e dytë”, shtoi ai.
Kandidati i Partisë së tij për Ligj dhe Drejtësi, presidenti aktual, Andrzej Duda, do të përballet në balotazh me kryetarin e Varshavës, Rafal Trzaskowski. Rrethi i parë i zgjedhjeve është mbajtur të dielën e kaluar.
