Pandeli Majko ka pranuar mandatin e deputetit, pas arrestimit të Alqi Bllakos. GJKKO ka lënë në burg ish-deputetin Alqi Bllako, i cili u arrestua për “korrupsion” dhe “shpërdorim detyre” në lidhje me aferën e inceneratorit të Fierit.
Pas më pak se një viti mungesë, socialisti Pandeli Majko do të rikthehet në Kuvend. Sot Majko ka dorëzuar në Komisionin Qendror të Zgjedhjeve formularin e dekriminalizimit.
Ai do të zërë ulësen e Alqi Bllakos, të cilit iu vunë prangat me kërkesë të SPAK, për shkak të përfshirjes në aferën e inceneratorit të Fierit.
Pandeli Majko u largua nga Kuvendi pas zgjedhjeve parlamentare të 25 Prillit, sepse nuk arriti të grumbullonte votat e nevojshme për të thyer herësin, pasi ishte renditur jashtë listës së sigurt.
Prokuroria e akuzon Alqi Bllakon se ka shpërdoruar detyrën, duke dorëzuar në Këshillin e Ministrave një dokumentacion të falsifikuar për llojin e tokës ku u ndërtua inceneratori i Fierit dhe shpronësimi është bërë në një vlerë shumë më të madhe.
Ndaj tij rëndon edhe akuza për korrupsion, ku SPAK thotë se ka përfituar rreth 15 milionë lekë në formën e pagave për babain e tij, pasi ka favorizuar kompaninë e Klodian Zotos, më të cilin rezulton sipas SPAK, të ketë udhëtuar jashtë vendit.
Të gjitha këto akuza janë hedhur poshtë nga avokati mbrojtës i Bllakos, Sokol Hazizaj.
