Gjykata e Lartë ka refuzuar rekursin e ish-ministrit Lefter Koka. Ky i fundit bëri rekurs për vendimin e Apelit të GJKKO-së, që e la në burg për përfshirjen në skandalin e inceneratorëve. Ish-ministri u arrestua më 14 dhjetor 2021, për skandalin e inceneratorëve, ndërsa GJKKO caktoi në datën 16 dhjetor masën e sigurisë “arrest me burg” dhe aktualisht ai po mbahet në paraburgimin e 313. SPAK akuzon Lefter Kokën për “shpërdorim detyre”, “pastrim parash” dhe “korrupsion” për incineratorin e Elbasanit.
SPAK prangosi ish-ministrin e Mjedisit, Lefter Koka për dosjen e shumëpërfolur, atë të inceneratorit në Elbasan. Tre janë akuzat e rënda me të cilat ish-ministri tashmë do nisë betejën e tij me drejtësinë, teksa janë sekuestruar edhe kompanitë “Albtek Energy”, pra inceneratori i Elbasanit, “Integrated Technology Services” si edhe aksionet e Kokës në “Kantinën e Pijeve Gjergj Kastrioti Skenderbeu”.
