Policia Bashkiake dhunoi mbrëmjen e së hënës një të ri rom, që po mblidhte kanaçe. Pamjet që u shpërndarë në rrjet, shkaktuan indinjatë. Personi që u dhunua, ka rrëfyer se bashkë me të në ato çaste ka qenë edhe bashkëshortja e tij shtatzënë.
Hekuran Shaqiri u dhunua nga dy policë bashkiakë mbrëmjen e së hënës, në zonën e Yzberishtit. Ai tregon se e kanë marrë me dhunë dhe e kanë futur në makinën e Policisë Bashkiake.
“Më morën me zor dhe më futën në makinën e Policisë Bashkiake. Unë insistoja të mos futesha në makinë, pasi kisha dhe nusen me vete që ishte dhe shtatzënë. Ata më dhunuan dhe duke më tërhequr me zor për të më futur në makinë”.
33 vjeçari dëshmon se policët i kanë ofruar 2 mijë lekë të vjetra, për të mbuluar ngjarjen.
“E panë që ishin gabim, më rrafën dhe më pas më dhanë një 2 mijë lekësh dhe u zhdukën. Unë vajta në komisariatin nr 6 dhe bëra kallëzim”, ka thënë ai.
Lidhur me këtë rast, Avokati i Popullit ka nisur hetimet, ku është përfshirë edhe një civil. Ndërkohë në komisariatin nr 6., është dorëzuar një kallzim penal drejtuar dy policëve të Policisë Bashkiake.
Ndaj policëve bashkiakë kanë nisur hetimet për ‘shpërdorim detyre” dhe “dhunë kundrejt personit”.
