Dalin detaje nga aksidenti i rëndë në Rumani, ku humbi jetën oficeri shqiptar i kontaktit dhe bashkëshortja e tij, shtetase rumune.
Duke iu referuar mediave rumune, katër persona kanë mbetur të plagosur nga aksidenti, ndërsa ngjarja ka ndodhur në rrugën Kombëtare 15, ndërmjet Brnukovenës dhe Susenit. Mësohet se tre automjete janë përplasur me njëra-tjetrën, dy makina dhe një kamion; ky i fundit është përmbysur ndërsa dy makinat e vogla kanë dalë nga rruga.
Njëra prej mjeteve ishte me targa diplomatike, për të cilën mediat vendase shkruajnë se i përket Ambasadës së Shqipërisë.
Lajmi për vdekjen e oficerit shqiptar dhe gruas së tij u konfirmua nga Policia e Shtetit: “Policia e Shtetit shpreh dhimbjen dhe solidaritetin për familjarët e 41-vjeçarit dhe bashkëshortes, për humbjen e papritur dhe të parakohshme të të afërmve të tyre, si dhe është e angazhuar maksimalisht dhe në bashkëpunim të vazhdueshëm me autoritetet rumune për zbardhjen e shkaqeve të aksidentit”, thuhet në një njoftim të Policisë së Shtetit.”
