Sa i takon vendimit për aksionin opozitar, kreu demokrat Basha mblodhi sot aleatët në selinë e Partisë Demokratike, për të diskutuar mbi vijimësinë e protestave të opozitës. Kreu i Partisë Republikane, Fatmir Mediu, pas takimit me Bashën dhe aleatët e partive të tjera, tha se problemi më i madh i Shqipërisë mbetet korrupsioni. Po kështu ai pohoi se detyra kryesore e opozitës është që të koordinojë veprimet me qytetarët në protestat që janë njoftuar.
“Ajo që është e rëndësishme është të koordinojmë veprimet me qytetarët para Parlamentit, i cili është tërësisht ilegjitim. Duhet ta kthejmë Shqipërinë në rrugën europiane. Unë iu thashë se çdo të bëj opozita. Opozita duhet të bëjë çdo gjë që do ta çojë Shqipërinë në binarët kushtetues dhe europian. Problemi më i madh i Shqipërisë është korrupsioni”, tha ai.
Po kështu, në të njëjtën linjë qëndroi edhe kreu i LZHK-së, Dashamir Shehi, i cili nënvizoi se sulmi i opozitës do të jetë 360 gradë, në gjithë institucionet dhe hapësirën politike.
“Qëllimi ynë është largimi i Ramës dhe krijimi i një qeverie tranzitore që të marrë përsipër të bëjë dy-tre punë të mira, të pastrojë ambientin politik nga krimi dhe të mundësojë zgjedhje të reja dhe të lira, pastaj po qenë të zotë le të fitojnë prapë. Por kjo është radha e opozitës, pasi këta që janë sot, janë diskredituar edhe në rrafshin ndërkombëtar. Ndërkombëtarët kanë marrë pozicionin e vetë, ne i mirëkuptojmë, por duhet që të kuptohet se sa të jetë Rama do ketë drogë dhe jo stabilitet”.
Nëse Rama nuk tërhiqet, a do tërhiqet opozita nga zgjedhjet lokale?
“Duhet të dini që sulmi i opozitës do të jetë 360 gradë, në gjithë institucionet dhe hapësirën politike. Këtë nuk e kemi diskutuar akoma, por duhet të presim protestën e datës 16 njëherë”, përfundoi ai.
