OSBE i bën thirrje qeverisë shqiptare të rishikojë paketën (antishpifje) ligjore për shtypin në Shqipëri, pasi sipas tyre ky projektligj i vë shumë kufizime lirisë së shtypit.
Në një intervistë për Zërin e Amerikës, përfaqësuesi i OSBE-së për lirinë e shtypit, Harlem Desir, u shpreh se qeveria e Shqipërisë duhet të mbrojë lirinë e shtypit, aq më tepër tani që vendi po kalon situata të acaruara politike.
“Ne mendojmë se është shumë e rëndësishme për Shqipërinë që të mbrojë lirinë e shtypit dhe të shmangë në të ardhmen kufizimin e lirisë së shprehjes për mediat online. Projekt-ligji aktual u jep shumë kompetenca agjencive rregulluese AMA ose AKEP që janë mbikëqyrës të sistemit të transmetimeve. Ato nuk duhet të marrin rolin e gjykatësit për rastet e shpifjeve për shembull, ose për raste të tjera që u takojnë gjykatave t’i zgjidhin”, tha ai.
Më tej, ai vijoi duke thënë se OSBE-ja po punon me qeverinë shqiptare që legjislacioni i ri të ndryshohet në përputhje me standardet më të mira ndërkombëtare.
Sipas Desir, përqendrimi i pronësisë së mediave, veçanërisht të televizioneve dhe gazetave kryesore është një tjetër problem kryesor i shtypit në Shqipëri.
“Situata aktuale politike në Shqipëri, nuk duhet lejuar të ndikojë mbi lirinë e shtypit. Edhe po të ketë kriza politike, siç ndodh në shumë vende, shtypi duhet të jetë i lirë të bëjë punën e tij”, shprehet zyrtari i lartë i OSBE-së.
Këto komente përfaqësuesi i OSBE-së i bëri gjatë një seance të organizuar nga Komisioni amerikan i Helsinkit në mjediset e Kongresit lidhur me raportin e fundit të OSBE-së për lirinë e shtypit në 57 vendet anëtare të organizatës. Në bazë të këtij raporti, në gjashtë mujorin e parë të këtij viti dy gazetarë janë vrarë në detyrë, ndërsa 92 tjerë janë sulmuar e kërcënuar.
