Ministrja e Ekonomisë dhe Financave, Anila Denaj, tregon detaje të reja në lidhje me paketën ekonomike, që u prezantua mbrëmë nga kryeministri Rama.
Në një lidhje live me emisionin “Real Story”, Denaj tha se janë paraqitur shumë kërkesa nga ana e bizneseve, por sipas saj vetëm më të rëndësishmet janë marrë parasysh.
Denaj theksoi se në thelb të kërkesave ka qenë rimbursimi i TVSH-së, teksa shton se ka pasur edhe kërkesa të tjera në lidhje me taksat e pushtetit vendor, apo në lidhje me pjesën e tatim-fitimit.
“Janë kërkesa që janë artikuluar që ditën e parë të mbylljes së biznesit. Disa kërkesa në fillim kanë qenë të panevojshme për t’u materializuar, pasi ato duhen materializuar me fakte, që të mbështeten nga qeveria. Sot kishim një ankesë të përmbledhur mbas një anketimi të 360 bizneseve, ku pamë dhe ju shkuam të gjitha problematikave. Rimbursimi i TVSH ishte në thelb. Biznesi kërkon me të drejtë që rimbursimi i TVSH të shkojë në kohë reale, pa burokraci dhe pa vonesa. Ka pas kërkesa për disa taksa të pushtetit vendor.
Kërkesa të tjera kanë qenë në lidhje me pjesën e tatim-fitimit, ku në momentin e parë edhe ne si ministri kemi artikuluar rivlerësimin si një instrument që ekziston prej kohësh. U vendos që tatim-fitimi të shtyhej për 2021. Tatim-fitimi paguhet çdo muaj, si referencë përdoret tatim-fitimi i vitit të mëparshëm. Elementet e rivlerësimit janë çdo muaj, por puna administrative do të ishte e madhe. Me këtë shtyrje besoj se arrijmë të kënaqim nevojat e biznesit. Pra, sigurisht ka kërkesa që shkojnë për të shtyrë çdo lloj taksimi e tatimi, por kjo është e pamundur. Ndërsa tatim-fitimi do të jetë aq i vogël, por do ta përballojmë duke e shtyrë për vitin tjetër”, tha ajo.
Sa i përket pagesës prej 400 mijë lekëve që do iu jepet atyre që janë afektuar nga kjo situatë, Denaj theksoi se kjo pagesë është vetëm një herë dhe nuk do të përsëritet në maj.
“Me këtë pagesë ne kemi kuptuar që situata do vazhdojë deri në maj, por pagesa është e vetme, një herë dhe nuk është e përsëritur në maj. Po flasim për persona që janë të papunë, në pjesën më të madhe, dhe për ata që i takojnë biznesit të vogël, të cilët kanë qenë të hapura, kanë operuar, prandaj nuk konsiderohet si pagë lufte”, tha ajo.
