Ish-prokurori Shkëlqim Hajdari, e konsideron të humbur gjyqin në Gjykatën Korreksionale të Parisit, ku ish-kryeministri Sali Berisha do të zhvillojë betejën ligjore ndaj Sekretarit amerikan të Shtetit Antony Blinken.
I ftuar në emisionin ”Open”, Hajdari u shpreh se deklarata e avokatit të Berishës është e papërgjegjshme nga ana profesionale.
Shkëlqim Hajdari: “Deklaratë e papërgjegjshme, ti je një vend tjetër dhe shkon i drejtohesh Francës. Ky gjyq o do të mbyllet me një seancë dhe aty mbaron ky gjyq. Edhe unë avokat jam, shikoje që nëse do të ketë më tepër se një seancë ai gjyq do të mbyllet, është e papërgjegjshme nga ana profesionale. Ai e di vetë pse e mori, por ky gjyq është i humbur. Kleçka juridike që përdori nuk shkon”.
Më 19 maj, Departamenti amerikan i Shtetit (DASH), shpalli ”non grata” ish-kryeministrin Sali Berisha dhe familjen e tij.
Lajmi u dha nga Sekretari Amerikan i Shtetit, Antony Blinken i cili njoftoi zyrtarisht se Berisha ka minuar demokracinë, dhe se gjatë ushtrimit të detyrës së kryeministrit, është përfshirë në afera korruptive.
Në faqen zyrtare, DASH ka publikuar vendimin e plotë, ku thuhet se Berisha ka qenë i përfshirë në veprime korruptive për shpërdorim të fondeve publike, dhe ndërhyrje në proceset publike duke përdorur pushtetin.
Në vendimin e tij, Blinken ka përcaktuar si të papërshtatshëm edhe bashkëshorten e ish-kryeministrit Liri Berisha, djalin Shkëlzen Berisha dhe vajzën Argita Berisha Malltezi.
Berisha ka vendosur të padisë Blinken në Gjykatën Korreksionale të Parisit për shpifje publike, teksa avokati i tij do të jetë Jean-Yves Le Borgne.
