Shteti afrikan Guinea Bissau nuk e ka tërhequr njohjen e Kosovës.
Këtë e konfirmoi vetë ministri i Punëve të Jashtme të Kosovës, Behgjet Pacolli i cili mori pjesë në Forumin ku u diskutua për spektrin e politikave të BE-së ndaj Kosovës.
“Njohja e Guinea Bissau nuk është tërhequr, Kosova është njohur në vitin 2010 me një notë verbale nga presidenti që nuk jeton më”, tha Pacolli në këtë Forum, ndërsa shtoi se në janar të 2018-ës Kosova do të ketë marrëdhënie diplomatike me këtë shtet.
“Dje e kemi vizituar presidentin e Guinea Bisau dhe prej janarit do të kemi marrëdhënie diplomatike me Guinea Bissau”, ka theksuar Pacolli.
Ishte ministri i Jashtëm serb, Ivica Daçiç ai që në mesin e muajit nëntor njoftoi se ka pasur një komunikim me kryeministrin e Guinea Bissaus dhe ka marrë lajmin se ky shtet i Afrikës e ka tërhequr njohjen për pavarësinë e Kosovës.
Pacolli tha në forum se ka pasur tendenca që njohjet të tërhiqen edhe pse Kosova zyrtarisht nuk ka marrë asnjë njoftim.
