Partia Agrare Ambientaliste,ka reaguar pas kërkesës së Komisionierit Europian për Zgjerimin, Oliver Varhelyi, drejtuar mazhorancës për të pritur opinionin e Komisionit të Venecias për ndryshimet kushtetuese.
Sipas kësaj force politike, kryeministri Edi Rama është duke penguar të ardhmen europiane të Shqipërisë dhe shqiptarëve.
PAA apelon se ҫdo përpjekje e përbashkët e të gjithë faktorëve politikë e socialë për të avancuar në proҫesin e integrimit europian, mund të ndihmojë Shqipërinë.
Reagimi i PAA në Facebook
Rama me arrogancën e tij po e mbyll sërish derën e hapur të BE-së.
Kërkesa e Komisionierit Europian për Zgjerimin Oliver Varhelyi drejtuar mazhorancës për të pritur opinionin e Komisionit të Venecias përpara se të votojnë dekretin e presidentit për ndryshimet kushtetuese, është një provë e qartë së BE e mirëpret Shqipërinë në BE.
Qëndrimet e përhershme anti-europiane të Ramës janë një provë e gjatë dhe e qartë se për Ramën pushteti absolut është qëllim në vetvete, duke penguar të ardhmen europiane të Shqipërisë dhe shqiptarëve. Sovraniteti hipokrit i Ramës është një përpjekje e dështuar për të fshehur mentalitetin dhe qëndrimet e tij konstante anti-europiane.
Vetëm liderët arrogantë dhe të prekur nga pushteti absolut që korrupton në mënyrë absolute, pengojnë vendet e tyre në prioritetet e tyre kombëtare. Më shumë se 90% e shqiptarëve dëshirojnë integrimin europian.
PAA apelon se pritja e opinionit të Venecias, respektimi nga mazhoranca i kërkesës së komsionierit europian për zgjerimin dhe ҫdo përpjekje e përbashkët e të gjithë faktorëve politikë e socialë për të avancuar në proҫesin e integrimit europian, mund të ndihmojë Shqipërinë ti shpëtojë ngecies në varfërinë në rritje dhe të hedhë hapa konkretë shtet-formues dhe demokratizues.
Ndërkohë, Komisioni i Venecias ka marrë në dorëzim kërkesën e Presidentit të Republikës Ilir Meta, për ndryshimet në Kodin e ri Zgjedhor.
Komisioni bën me dije, se kërkesa është pranuar dhe do të shqyrtohet.
