Shkon në 40 numri i viktimave të shkaktuar nga ortekët që përfshinë provincën Van në Turqi.
Agjencia private e lajmeve turke DHS njoftoi se dy trupa të tjerë u gjetën të enjten, duke e çuar numrin e vdekjeve nga dy ortekët në të paktën 40.
Rreth 300 punonjës të shërbimit të urgjencës u thirrën ditën e martë në një autostradë në provincën Van, pasi vendi u përfshi nga një ortek. Pesë njerëz mbetën të vdekur ndërsa 2 të tjerë mbetën të varrosur nën dëborë. Më pas grupi i kërkim-shpëtimit u godit nga një ortek i dytë.
Kreu i zyrës së Autoritetit të Fatkeqësive dhe Urgjencës së Turqisë, Osman Ucar, u shtrua në spital pasi u kap në ortek. Nga spitali, ai tha për Agjencinë e Lajmeve Ihlas se shumë prej tyre ishin jashtë zonës ku goditi orteku i dytë të mërkurën.
Përveç numrit të vdekjeve, dhjetëra persona të tjerë u plagosën. Ministri i Shëndetësisë Fahrettin Koca tha të enjten se 47 persona mbetën të shtruar në spital pas ortekëve. Ai tha se gjashtë ishin në kujdes intensiv, ndërsa shtoi se nuk ishin në gjendje kritike.
