Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus ka propozuar një fazë të dytë të studimeve mbi origjinën e koronavirusit në Kinë, duke përfshirë auditimet e laboratorëve dhe tregjeve në Wuhan.
Kjo kërkesë, vjen pasi Tedros tha që hetimet po vështirësoheshin nga mungesa e të dhënave të para në ditët e para të përhapjes së COVID-19 në Kinë, shkruan Wio News.
Faza e dytë do të përfshinte kërkime në njerëz, kafshë dhe gjallesa që janë shitur në tregjet e Vuhanit, duke përfshirë edhe tregun Huanan.
Në këtë fazë do të kërkohej “auditimi i laboratorëve relevantë dhe institucioneve kërkimore që veprojnë në këtë zonë, me qëllim të identifikimit të rasteve të para të infektimit në njerëz, në dhjetor të vitit 2019”, ka thënë Tedros. Diplomatët kanë thënë se Kina, ka kundërshtuar planin, në takimin me dyer të mbyllura, duke thënë se “ai nuk është bazë për studime në të ardhmen”.
Një ekip i OBSH-së ka kaluar katër javë, në dhe rreth qytetit të Vuhanit, bashkë me hetuesit kinezë, dhe së bashku shkencëtarët kanë thënë në mars, se virusi mund të jetë bartur nga lakuriqi në njerëz, përmes një kafshe tjetër.
Por, vendet si Shtetet e Bashkuara dhe disa shkencëtarë tjerë, kanë kërkuar hetime shtesë, sidomos në Institutin e Vuhanit për Virologji, i cili ka qenë duke kryer hetime për lakuriqë të ndryshëm.
