Anëtarët dhe simpatizantët e Partisë Republikane, do ti bashkohen protestës së artistëve gjatë ditës së sotme në Tiranë. Kreu i Partisë Republikane, Fatmir Mediu, ka mbledhur Kryesinë e partisë që ai drejton, për t’u organizuar për protestën që do mbahet pasditen e sotme.
Në fund të mbledhjes së Kryesisë së partisë, Mediu u shpreh se opozita do të jetë e bashkuar me qytetarët dhe artistët kundër qeverisë. Ai po kështu akuzoi kryeministrin Rama, se po e kthen vendin në kohët e errëta të diktaturës.
“PR do të jetë sot me artistët. Opozita jo vetëm do të jetë e bashkuar brenda vetes së saj, por do jetë me çdo qytetar, të majtë e të djathtë. Nuk është vetëm protesta e sotme, por opozita duhet të hapë sytë e saj dhe të qytetarëve, se nuk duhet të vazhdohet kështu. Rama po e rikthen vendin në kohët e errëta të diktaturës.
Në mbledhjen e sotme të Kryesisë së PR kemi kërkuar një mbështetje dhe angazhim masiv për protestën e sotme. Pas kësaj proteste, opozita duhet të dalë me një qëndrim të qartë për të garantuar zgjedhje të lira e të ndershme”, tha Mediu.
