Në një kohë që tensioni dhe vëmendja kryesore e politikës dhe opinionit publik është përqendruar tek Gjykata e Tiranës dhe fatin e 23 kuksianëve të arrestuar, Partia Socialiste ka bërë lëvizjen e radhës duke bërë thirrje për nisjen e mbledhjes së komisionit “Tahiri”.
Mësohet se mazhoranca ka njoftuar nisjen e mbledhjes, pak para fillimit të saj. Konkretisht, zyra e shtypit e Kuvendit njoftoi në orën 12:23 minuta se në orën 12:30 (pra 7 minuta më pas) do të mblidhej komisioni.
Por në të njëjtën kohë, deputetët e opozitës nuk janë të pranishëm. Kjo për faktin se ata ndodhen në gjykatë, duke ndjekur nga afër seancën ku pritet të jepet masa për kuksianët e arrestuar.
Kujtojmë se Komisioni hetimor parlamentar për ish-ministrin e Brendshëm është ngritur me kërkesë të opozitës, pas akuzave të kësaj të fundit ndaj qeverisë dhe Kryeministrit Rama se ka penguar drejtësinë të bëjë punën e saj.
