Simpatizantë të opozitës së bashkuar janë mbledhur tashmë para Kryeministrisë, për të protestuar për largimin e Ramës.
Ndryshe nga protestat e tjera, kjo e sotmja u vendos të nisë pasdite ndërsa nuk dihet kohëzgjatja e saj.
Por, edhe sot kryeministri nuk ndodhet në Tiranë, njësoj si në protestat e 16 shkurtit dhe 16 marsit kryeministri nuk do te jete ne Tirane.
Burime të “Panorama” bëjnë me dije se kreu i qeverisë, pas samitit të zhvilluar në Kroaci është nisur për një tjetër vizitë zyrtare dhe nuk do të jetë në Tiranë. Nga ana tjetër, opozita kërkon me çdo kusht largimin e tij dhe krijimin e një qeverie tranzitore që ta çojë vendin drejt zgjedhjeve të parakohshme.
Godina e Këshillit të Ministrave, prej më shumë se 24 orë është blinduar me masa të forta sigurie, për të parandaluar çdo tentativë të protestuesve për të hyrë në brendësi të godinës njësoj si në 16 shkurt.
I gjithë perimetri i godinës është i rrethuar me prozhektorë dhe kamera, ndërkohë që edhe në godinat e tjera do të ketë agjentë të specializuar për të filmuar të gjitha zhvillimet e protestës së sotme.
