Në ditën e 1 Majit, një fierak ka protestuar në një formë të veçantë, teksa ka dalë në sheshin “Evropa” me një pankartë.
Ai është Edmond Hoxha, i cili ka dalë për të dytin vit radhazi, për të shprehur pakënaqësitë e tij lidhur me kushtet e punës.
Ai është punëkërkues në sektorin e ndërtimit, ndërsa shprehet për BalkanWeb se ky sektor është i paralizuar dhe se me aq sa punon nuk arrin të shlyejë dot faturat mujore.
“Protesta ime nuk është politike. Bërtas për të gjithë. Për ata njerëz që ankohen dhe e kanë të vështirë. Punoj në ndërtim, por nuk arrij të paguaj faturat”, ka deklaruar Hoxha, duke shtuar se edhe pse është kohë protestash ai nuk ka dalë në rrugë për të mbështetur ndonjë subjekt politik.
“O Skënderbe e mbajte fjalën, punësove 300 000 shqiptarë në Gjermani”, shkruhet në pankartën që mbante në dorë, duke ironizuar kryeministrin Rama.
Edmond Hoxha nga Mbrostar Ura është 43 vjeç, babai i një djali 18-vjeçar dhe mendon se kjo është një formë e përshtatshme jo vetëm për të kërkuar punë, por për të ndërgjegjësuar popullin të kërkojë të drejtën për të punuar dhe një maji është dita kur këto kërkesa mund të dëgjohen.
“Njerëzit të ngrihen njëherë për veten e tyre, mjaft u ngritën vetëm për partitë politike”, thotë Hoxha.
