Në vazhdimin e takimit më fermerë, operatorë turistik në Dibër, kryeministri Edi Rama në një bashkëbisedim me një qytetar ka ndarë kritikat që merr çdo ditë. Ai u shpreh se dëgjon shpesh frazën “O idiot, nuk bëhet ky vend”, por tha se është i bindur që ky vend do bëhet. Duke qëndruar në të njëjtën linjë, Rama theksoi se Shqipëria është “Austri e Zvicër”, por mjafton të ketë dëshirë e vullnet dhe për të ndihmuar njëri-tjetrin.
“Për sa i përket personave të interesuar në investime por për rrethana të ndryshme nuk i kanë të dokumentuara pronësitë e tokave, ne nuk do ti pengojmë pavarësisht këtyre mungesave.
Dhe në rast se del një pronar i pretenduar ose real, do merret shteti dhe jo individët.
Bashkë me Bashkinë e Dibrës jemi duke mbështetur dhe ndihmuar fermerët. Kjo zonë është e bekuar nga Zoti dhe këto vite bekimi po kthehen në mirësi falë jush dhe atyre që ndërtojnë këto struktura.
Ky vend është Austri e Zvicër. Mjafton të ketë dëshirë e vullnet, do të mbështesim njeri-tjetrin. Mua më thonë përditë “O idiot nuk bëhet ky vend”, ndërkohë ty të thonë “Se ke ti fajin”, ndërkohë mua më thonë “Ti e ke fajin”. Jeni frymëzim për ne dhe nxitje për qytetaret e tjerë t’u bashkohen në rrugën tuaj”, tha Rama.
