Kultivimi i bimëve medicinale dhe aromatike është një ndër mundësitë më të mira për punësimin dhe vet-punësimin e të rinjve. Për këtë arsye, Bashkia Kolonjë e mbështetur nga Risi Albania ka ndërmarrë iniciativën për të promovuar Kolonjën si një destinacion për tërheqjen e investimeve në sektorin e bimëve medicinale, ose çarjave siç i njohim të gjithë në gjuhën e përditshme.
Drejtuesit e projektit po bëjnë takime të njëpasnjëshme me fermerë dhe eksportues të këtyre bimëve në rajon, duke bërë të mundur kështu rritjen e investimeve në këtë drejtim. Bashkia Kolonjë po asistohet në këtë projekt nga Organizata Njerëz dhe Ide, me qëllimin e përbashkët për të arritur nxitjen e përfshirjes të sa më shumë të rinjve në këtë sipërmarrje. Deri më tani është bërë i mundur bashkëpunimi dhe bashkëveprimi i shoqërive që kanë bërë hapa të rëndësishëm në promovimin dhe kultivimin e bimëve medicinale, jo vetëm në Shqipëri, por edhe në botë.
Mediterranean Export – Imports Albania (MEIA) në Malësinë e Madhe e cila prodhon vajra esenciale dhe ka kontrata me rreth 500 fermerë për kultivimin e BMA-ve është një ndër kompanitë kryesore në rajon për eksportin e vajrave esencialë në Shtetet e Bashkuara të Amerikes e më gjerë. Takimi me Z. Emiland Skora, drejtuesi i kompanisë MEIA ka qënë frytedhënës për të dyja palet. Nga njera anë perfaqësuesit nga Kolonja u njohën me mundesië që kanë fermerët për të lidhur kontrata për kultvimin e bimeve medicinale dhe aromatike. Nga ana tjeter kompania MEIA u njoh me potencialet që ka zona e Kolonjës për kultivmin organik te BMA-ve falë përbërjes së tokës, kushteve klimaterike dhe gjeografike të saj, mungesës së industrive që mund të ndotin mjedisin dhe mungesa e bujqësisë intensive.
Në vijim përfaqësuesit nga Kolonja zhvilluan takimin e rradhës pranë kompanise Biobes me qendër në Lushnje. Kompania Biobes është një eksportues i cili po rrit ndjeshëm eksportet në tregje me vlerë të lartë si Zvicer, Austri, Francë, Gjermani, etj, falë modelit të ri që ka ngritur për rritjen e cilësisë dhe garantimit të furnizimit të qëndrueshem me bimë medicinale dhe aromatike të certifikuara organike. Biobes synon të investojë sa më afër fermerëve dhe të rrisë bashkëpunimin nëpërmjet kontratave për kultivimin e bimëve të certifikuara organike.
Administoratori i kompanisë Biobes Z. Besnik Koci u prezantoi përfaqësuesve nga zona e Kolonjës modelin e bashkëpunimit me fermerët për kultvimin e bimëve medicinale dhe aromatike. Ai theksoi që Biobes bazohet në parimin e mbështetjes së fermave të vogla familjare në zonat rurale që kanë traditë në mbledhjen e bimëve aromatike dhe medicinale në gjendje të egër, duke nxitur këto familje të nisin kultivmin me kontratë të bimeve medicinale dhe aromatike.
Së shpejti Bashkia Kolonjë do të prezantojë paketen e investimeve në sektorin e bimëve vedicinale dhe aromatike në Kolonjë pranë eksportuesve dhe investitorëve potencialë dhe ka shprehur gatishmerinë për të asistuar çdo investitor të interesuar.
