Mbrëmjen e sotme kryeministri Edi Rama është i ftuar në “Opinion”, ku është vënë përballë një përmbledhje të kërkesave, ankesave dhe komenteve që studentët bënë një natë më parë po në këtë studio, ku ndër të tjera kanë treguar se detyrohen të punojnë shitës apo të largohen për të mbuluar shpenzimet.
Debati në studio ka qenë i nxehtë pasi Rama është përplasur me të gjithë analistët në studio dhe ngriti zërin në momentin që e ndërpresin. Moderatori i emisionit, Blendi Fevziu gjatë një debati me kryeministrin nxehet pasi ky i fundit po fliste me tone të larta dhe i drejtohet: Mos ma ngri zërin mua!
Debate të ashpra kryeministrit Edi Rama pati edhe me pedagogun Mark Marku. “Mos dëgjoni këta, ky zotëria ka hallin e PD-së”, iu drejtua Rama-Mark Markut.
Akuzë e kreut të qeverisë kjo që solli përplasje verbale mes Ramës dhe Markut.
“Ore po është turp kjo që thua, mjaft se s’jam halabak, njerëzit po të vdesin rrugës”, iu drejtua pedagogu-Ramës.
