Kryebashkiaku Erion Veliaj, i cili garon për një mandat të dytë për Bashkinë e Tiranës zhvilloi ditën e sotme një takim me banorët e Njësisë nr.8.
Në fjalën e mbajtur, Veliaj theksoi se falë rikonstruksionit të godinave ekzistuese dhe ndërtimit të çerdheve dhe kopshteve të reja, situata ka ndryshuar rrënjësisht, ndërsa shtoi se tashmë edhe vetë demokratët preferojnë që fëmijët e tyre t’i çojnë në çerdhet dhe kopshtet publike.
“U duhet thënë shokëve demokratë: çerdhja ku po shkon biri yt, a është pak më e mirë sot? Është më e mirë sepse shumë demokratë kanë futur mik për t’i çuar fëmijët në çerdhe publike, edhe pse kanë lekë për t’i çuar në privat. Sepse publiket janë bërë më të mira. Demokratëve të njësisë 8 duhet t’u themi: këto kopshtet që kemi bërë, kopshtet e njësisë tuaj, ku ju çoni fëmijët, sepse Luli i ka jashtë ose në privat, a janë më të mira sot? Janë shumë më të mira dhe ushqimi është më i mirë. Sot kemi 10 aplikime për 1 vend, ndërkohë më parë njerëzit s’i shihnin me sy çerdhet dhe kopshtet publike. Sa prej këtyre demokratëve janë futur mik për të futur fëmijët në çerdhe publike sepse janë bërë më të mira”, u shpreh ai.
Ndër të tjera, kryebashkiaku tha për kreun demokrat, Lulzim Basha se ndonëse kishte drejtuar Bashkinë e Tiranës për 4 vite, sipas tij ai nuk kishte mundur dot të rregullonte as lagjen dhe rrugicën e tij.
“Jemi sot, patjetër te zemra e Tiranës, në një vend transformues, por jemi te lagjja e Lulit, i cili s’kishte asfaltuar as rrugicën e lagjes së tij. Nuk kishte mbjellë një pemë te lagjja e vet”, tha Veliaj.
