Suedia si duket po vuan pasojat e mos vendosjes së vendit në “Lock Down”, teksa numri i viktimave është rritur ndjeshëm në dy ditët e fundit.
Në 24 orët e fundit në Suedi kanë ndërruar jetë 170 persona, shifra më e madhe kjo e regjistruar ndonjëherë në vend.
Edhe ditën e djeshme u regjistruan 114 viktima, shifër mjaft e lartë kjo duke pasur parasysh se brenda 48 orëve në fundjavë u shënuan vetëm 29 viktima.
Suedia regjistron tashmë një numër total prej 1,203 viktimash. Ndërkohë janë shtuar edhe 482 raste të reja, duke e çuar në 11,927 numrin total të personave të infektuar.
Deri më tani në Suedi janë shëruar 381 persona, ndërsa 954 pacientë ndodhen në gjendje kritike për jetën.
Në listën e Worldometer për shtetet më të prekura nga COVID-19, Suedia renditet në vendin e 21-të për momentin.
Më shumë se 2 milionë njerëz nga e gjithë bota janë prekur nga koronavirusi, ndërsa rreth 133 mijë persona kanë humbur jetën.
