Real Madrid ka siguruar kualifikimin për në fazën çerekfinale të Champions League dhe vazhdon rrugën për të fituar trofeun prestigjioz për të tretën herë radhazi. Gjiganti parisien PSG duket se nuk është akoma një ekip për në Europë, pasi në rezultat të përgjithshëm u mposht 5-2 nga kampionët në fuqi. Francezët e panë veten në disavantazh në fushën e tyre nga goli i shënuar me kokë nga Cristiano Ronaldo, në minutën e pestë të pjesës së dytë.
Real Madrid, që e nisi ndeshjen i sigurt pas fitores në ndeshjen e parë, nuk pati në radhët e tij Modric dhe Kroos, që nuk janë riaftësuar plotësisht, megjithatë e kontrolloi mirë fushën duke administruar avantazhin.
Nga ana tjetër, PSG vuajti mungesën e futbollistit më të shtrenjtë të historisë, Neymar. Goli i miqve erdhi si pasojë e një gabimi të Dani Alves. Asensio që rikuperoi topin nisi një pasim të artë për Lucas Vasquez, i cili krosoi te Cristiano Ronaldo, që tundi rrjetën me një goditje të saktë me kokë.
PSG mbeti me dhjetë futbollistë, 25 minuta para fundit, si pasojë e kartonit të dytë të verdhë të marrë nga italiani Verratti, por arriti të barazojë me golin “qesharak” të Edinson Cavani. Gjithsesi, ndeshja u mbyll 1-2, pas golit të Casemiro, 10 minuta para fundit.
Ylli portugez është i pandalshëm këtë sezon në Champions, pasi ka shënuar në 9 ndeshje radhazi, duke barazuar Ruud Van Nistlerooy. Ai është golashënuesi më i mirë në historinë e kësaj veprimtarie me 119 gola.
LIVERPOOL 0-0 PORTO
Anglezët janë treguar të rezervuar në sfidën e kthimit përballë Portos, pasi në ndeshjen e parë i kishin shkatërruar me goleadë, 5-0.Ashtu siç pritej, ndeshja nuk kishte asnjë histori dhe dukej më tepër si një ndeshje stërvitore mes dy skuadrave sesa një ndeshje e fazës së nokautit në Champions League. Gjithsesi, rastet për të shënuar nuk munguan nga të dyja skuadrat.
Pas pushimit ishte Firmino ai që kishte një mundësi të mirë. Në fund të takimit Iker Casillas, i cili me shumë mundësi luajti ndeshjen e fundit në Champions League, bëri një pritje fantastike ndaj Danny Ings duke ruajtur rrjetën e tij të paprekur. Liverpool kalon në çerekfinale ashtu siç ishte parashikuar.
