Ish-deputeti Kujtim Gjuzi është përjashtuar nga primaret e PD-së për Tiranën. Ky detaj u vu re në kohën kur kjo forcë politike publikoi mesditën e 7 nëntorit emrat e 7 kandidatëve të cilët do të marrin pjesë në procesin e primareve, që po zhvillohen për të nxjerrë një kandidat për Bashkinë e Tiranës.
Kryetarja e Komisionit të Organizimit dhe Kontrollit të Operacioneve Elektorale (KOKOE), Albana Vokshi, tha se kandidatët ishin Adriana Kalaja, Belind Këlliçi, Enkelejda Fejzo, Fatmir Merkoçi, Gerti Bogdani, Ilir Alimehmeti dhe Julian Deda.
Kujtim Gjuzi nuk ishte, ç’ka nënkuptonte se ai ishte përjashtuar. Degët e Partisë Demokratike të Shqipërisë kanë kërkuar shtyrjen e afatit për kandidimin në primare në 12 nëntor, për shkak të kohës së pamjaftueshme për organizimin e mbledhjeve në çdo nivel organizativ dhe marrjen e propozimeve apo vetë-propozimeve nga struktura partiake në territorin që ata mbulojnë. Nga ky vendim, i marrë nga Partia Demokratike, përjashtohen 16 degët e Bashkisë Tiranë.
