Gjatë ditëve të fundit është vënë re se italianët nuk respektojnë rregullat e vendosura për mbrojtjen nga Covid-19. Ndonëse autoritetet nuk ia kanë dalë dot mbanë edhe me vendosjen e gjobave, me ashpërsimin e masave, duket se tashmë është gjetur një mënyrë novatore për të monitoruar lëvizjen e njerëzve.
Raportohet se policia italiane ka fituar të drejtën për të përdorur dronë, për të monitoruar lëvizjet e njerëzve. Autoriteti Kombëtar i Aviacionit Civil (ENAC), autorizoi përdorimin e dronëve, për të monitoruar lëvizjet e njerëzve në zonat e populluara, për të siguruar pakësimin e të infektuarve me Covid-19. Autorizimi u bë i ditur përmes një letre të publikuar në faqen zyrtare të ENAC.
Kur nisi përhapja e virusit në Itali, autoritetet bllokuan lëvizjen vetëm në zonat e prekura, në veri të vendit. Më 9 mars u kufizua lëvizja në gjithë vendin. Ata që thyejnë rregullat, përballen me gjoba që nisin nga 200 euro dhe me gjashtë muaj burg. Të premten, u kërkua angazhimi i ushtrisë, pasi vdekjet pësuan rritje të frikshme dhe spitalet po përballeshin me fluks të madh pacientësh. Gjatë fundjavës, autoritetet ngushtuan masat.
Shefi i Organizatës Botërore të Shëndetësisë (OBSH), Tedros Adhanom Ghebreyesus, është shprehur se pandemia e koronavirusit ka marrë “hov”, duke u përhapur masivisht dhe më shumë se kurrë. Sot numërohen më shumë se 330 mijë të infektuar në të gjithë botën, dhe disa dhjetra mijëra të vdekur. Vendi më i prekur është Kina, e cila tashmë e ka marrë veten tërësisht, ndërsa në Europë është Italia.
