Pas konfirmimit nga ana e policisë se Jak Prenga kishte gjetur vdekjen kur po transportohej në resortin që do mbahej peng, ka ardhur edhe reagimi i familjes së tij.
Edhe pse nuk është gjetur ende trupi i tij, familja ka hapur dyert e mortit, ndërsa i kanë bërë thirrje shtetit që ta gjejnë sa më shpejt dhe ta sjellin pranë familjes. Në një prononcim për News24, kunati i viktimës, Mark Suli tregon se janë njoftuar nga policia për vdekjen e Prengës.
“Policia na thirri mbrëmë e na tha se ai nuk jeton më. Nuk i njohim të arrestuarit, as ne as personi që është marrë peng, as ka pasur asnjë lloj llogarie me ta. Shteti të gjejë trupin sa më shpejt dhe ta sjellë atë në shtëpi. Autorët të vihen para drejtësisë”, tha ai.
Jan Prenga ishte babai i 5 fëmijëve i cili sipas policisë u mor peng pas një konflikti droge mes një prej vëllezërve të tij dhe vëllezërve Hajri. Ai u mor peng para disa ditësh në rrugën “London” në Kamëz.
