Manchester City nuk di të ndalet, arrin të fitojë me përmbysje në transfertën përballë Huddersfield me rezultatin e ngushtë 2-1. Edhe pse në letër dukeshe një ndeshje mjaft e lehtë për “cityzen”, nuk ka rezultuar e tillë në fushë. Në 13 ndeshje të luajtura, “qytetarët” kanë fituar 12 dhe barazuar 1, duke treguar se kanë ritmin e duhur për të fituar titullin kampion. Penalltia e Sergio Aguero dhe goli i Sterling, përmbysën avantazhin fillestar të vendasve, kur Otamendi shënoi në portën e tij.
Një gabim i mbrojtësit Otamendi në fundin e pjesës së parë i jep avantazhin vendasve të Huddersfield, ku topin që vjen nga një goditje këndi e çon në rrjetën e portës së tij. Barazimi i skuadrës së Pep Guardiola erdhi sapo nisi pjesa e dytë. Sergio Aguero kthen në gol një penallti të fituar nga Raheem Sterling, duke realizuar golin e tij numër 9 në këtë kampionat, vetëm një më pak se golashënuesi më i mirë, Mohamed Salah i Liverpool.
Kur kishin mbetur edhe gjashtë minuta lojë, dominimi pa kushte i Manchester City u shpërblye. Gjatë një rrëmuje në zonën e Huddersfield, shkaktuar nga Gabriel Jesus, i sapo futur në fushën e lojës, Raheem Sterling u gjend në vendin e duhur, në momentin e duhur dhe realizoi atë që ishte goli i fitores për miqtë, i teti për të në këtë kampionat.
