“Nuk e vrau varka, por shteti!”, është motoja e protestës që do të mbahet në orën 19:00 të së enjtes para Ministrisë së Brendshme, marrë shkas nga tragjedia në plazhin Potam në Himarë, ku humbi jetën një 7-vjeçare.
Ngjarja e rëndë u shkaktua nga Arjan Tase, i cili ishte duke drejtuar gomonen, teksa e mitura Joanda Avdia ishte duke u larë në det.
Ngjarja ndodhi dje rreth orës 14:00. Në dëshminë e tij, Tase mësohet të ketë thënë se gomonia nuk ishte e tij, por ia kishte marrë mikut të tij për përdorim.
Ai ka deklaruar se gomonia kishte defekt, ka marrë gaz menjëherë dhe ka bërë një rrotullim në vend dhe ka goditur vajzën 7-vjeçare për vdekje.
