LSI ka reaguar për arrestimin e ish-drejtorit të Agjencisë së Mirëqenies dhe Kujdesit Social në Gjirokastër, Armand Mamani.
Përmes një deklarate për mediat, LSI shkruan se Armand Mamani nuk është kryetar i LSI Gjirokastër, dhe përgënjeshtron lajmet se arrestimi i tij është bërë në ambientet e kampit të Jalës.
Në reagimin për media sqarohet se aktiviteti përmbyllës i kampingut të Jalës është mbajtur mbrëmjen e 30 gushtit, ku foli kryetarja e LSI, Monika Kryemadhi, e ndërsa largimi i të rinjve nga kampi ka nisur më 31 gusht.
Reagimi i plotë
LSI sqaron median dhe opinionin publik se Armand Mamani nuk është aktualisht kryetar i LSI në Gjirokastër.
LSI po ashtu përgënjeshtron prerë lajmet se arrestimi i tij është bërë në ambientet e kampit të Jalës, si një fake news bajat dhe i sajuar.
Aktiviteti përmbyllës i kampingut të Jalës u mbajt mbrëmjen e 30 gushtit, ku foli kryetarja e LSI, Monika Kryemadhi, fjalë e cila u pasqyrua dhe live nga mediat. Largimi i të rinjve nga kampi ka nisur më 31 gusht nga ora 09:00.
LSI është hapur në çdo moment për të dhënë të gjithë informacionin e duhur që lidhet më të për mediat, dhe këdo tjetër me qëllim për të shmangur çdo abuzim dhe shtrembërim të qëllimshëm të informacionit.
Përhapja e këtyre lajmeve është thjesht një tentativë e dështuar e Rilindjes, për të devijuar vëmendjen e opinionit publik me lajme të rreme nga realiteti i demaskimit të kriminelëve klientë të saj, që kanë damkosur Rilindjen si një frymëzuese e përdoruese e trafikantëve, të korruptuarve dhe të inkriminuarve që po i njeh tashmë gjithë Shqipëria.
