Mbretëria e Bashkuar ka regjistruar sërish sot një numër të lartë viktimash, të shënuara nga koronavirusi.
Sipas mediave britanike, në 24 orët e fundit janë shënuar 763 viktima. Një rënie e lehtë kjo në krahasim me dje ku u regjistruan 828 persona të vdekur.
Ky është bilanci më i rëndë i shënuar për ditën e sotme nga vendet e Evropës. Ndërkohë janë regjistruar 4,451 raste të reja duke e çuar në 133,495 numrin total të personave të infektuar në Mbretërinë e Bashkuar.
Britania është ndër të paktat vende që nuk ka publikuar një bilanc të personave të shëruar nga COVID-19, duke lënë kështu enigmë edhe numrin e rasteve ende aktive në vend.
Me më shumë se 18 mijë viktima, Mbretëria e Bashkuar renditet e pesta në botë për numrin më të madh të personave që kanë humbur jetën nga ky virus, pas SHBA-ve (45,430), Italisë (24,648), Spanjës (21,717) dhe Francës (20,796).
Koronavirusi ka prekur më shumë se 2,5 milionë njerëz nga e gjithë bota, ndërsa i ka marrë jetën 180 mijë personave.
