Ish-kryeministri i Kosovës, Ramush Haradinaj, ka folur rreth asaj që pritet të bisedohet në takimin Kosovë-Serbi, në Uashington më 4 shtator.
Në një intervistë për emisionin Pressing në T7, Haradinaj tha se sot janë takuar të gjithë liderët e koalicionit dhe është biseduar në përpikmëri për atë se çfarë e pret delegacionin e Kosovës.
“Parimi i paprekshmërisë territoriale. Parimi i kushtetshmërisë dhe Zajednica nuk do të diskutohen në Uashington fare. Ndërsa që njohja të arrihet është pak e vështirë të besohet. Por do të ketë një avancim politik. Shtëpia e Bardhë do të kërkojë nga BE një avancim më të madh në dialog. BE është frikësuar që mos Shtëpia e Bardhë do të shtyjë përpara një marrëveshje përfundimtare por kjo nuk do të arrihet.
Do të ketë një avancim të madh në marrëdhëniet reciproke. Do të diskutohen kryesisht tema ekonomike”, u shpreh ai.
