20-vjeçares shqiptare, Sabrina Lekaj, e cila u godit me thikë për vdekje nga babai i saj, i është dhënë lamtumira e fundit.
Funerali i 20- vjeçares u mbajt dje në Flinders Park të Australisë. Mediat australiane kanë pasqyruar momente nga ceremonia funebre mbajtur ditën e djeshme, ku të pranishëm ishin familjarët, të afërmit dhe fqinjët e 20-vjeçares. Ndërkohë, vëllai i saj i vogël dhe nëna mbajtën fjalim për të dashurën e tyre që nuk jeton më.
“Sabrina ka ndikuar në çdo gjë që kam bërë, nuk do ta harroj kurrë. Ajo shkëlqente në çdo gjë që bënte. Gjëja e fundit që më tha ishte ‘të dua, shihemi më vonë’. Ajo ishte shumë e zgjuar dhe ka ndikuar që unë të bëhem më i mirë se ç’jam. Më ndihmonte me studimet që të bëhem i suksesshëm në jetë, sepse kjo ishte ajo që dëshironte edhe për veten e saj. Motra ime ishte shumë e dashur dhe kujdesej për mua, çdokund shkonim bashkë. Flisnim gjithmonë për çdo problem tonin”, u shpreh 11- vjeçari, Pirro Lekaj, ndërsa fshinte lotët.
Nëna e saj u kërkoi të pranishmëve që të kujtonin vetëm kohërat e bukura.
“Vajza ime e dashur, ti nuk na ke lënë, do të jesh gjithmonë këtu me ne. Ishe aq e bukur, aq e zgjuar dhe ke prekur kaq shumë njerëz. Jemi të pikëlluar nga humbja e Sabrinës, por ne duam që të kujtojmë kohët e bukura që kemi kaluar. Dua të kujtoj natën e parë që kaluam bashkë pasi të mora nga spitali. Dua të kujtoj ditën e parë kur të mora nga kopshti kur më the: Mos eja të më marrësh para orës 3. Dua të kujtoj të gjithë ditët e bukura, kujtimet e këndshme. Sot, është mundësia për t’i dhënë lamtumirë, por nuk do të ketë kurrë lamtumirë e dashur vajza ime, derisa ne të takohemi sërish bashkë. Do të mbaj gjithmonë në zemrën time”, u shpreh zonja Leskaj.
Ngjarja e rëndë ndodhi dy javë më parë, kur policia në Adelaide të Australisë Jugore gjeti të vdekur 20-vjeçaren shqiptare, Sabrina Lekaj, dhe të plagosur babanë e saj, Petrit Lekaj, 49 vjeç. Dyshohet se pasi goditi vajzën e tij, 49 vjeçari Lekaj ka tentuar të vrasë edhe veten e tij.
