Ish-deputeti i PD-së, Tritan Shehu e ka komentuar shoqërimin Bylykbashit në Polici, me nota të ashpra duke e cilësuar atë si një akt të turpshëm.
I ftuar në rubrikën “Opinion” në studion e News24, Shehu ironizoi shoqërimin e ish-kreut të PD-së Elbasan, duke thënë se kjo gjë ka ardhur pasi Bylykbashi ka shkelur nenin 5 të komunizmit, për agjitacion e propagandë.
“Unë mendoj se shoqërimi i z. Bylykbashi është i drejtë sepse shkeli nenin 55 të agjitacionit e propagandës, nen që ka burgosur, pushkatuar e internuar mijëra njerëz. Ai regjim kërkon të kthehet në Shqipëri. Nuk e kanë shkruar por e kanë në mentalitet e veprimtari”, u shpreh Shehu.
Ai e quan situatën alarmuese, duke e krahasuar gjendjen e tanishme në vend, me atë të pas viteve 1945. Sa i përket vendimit të Kolegjit për anulimin e dekretit të Presidentit, ai shprehet se çdo gjë po organizohet jo në përputhshmëri me ligjin, dhe bën thirrje për një lëvizje masive popullore, me një pjesëmarrje të gjerë të masave për t’iu kundërvënë diktaturës.
Deklarata e plotë:
“Unë mendoj se shoqërimi i z. Bylykbashi është i drejtë sepse shkeli nenin 55 të agjitacionit e propagandës, nen që ka burgosur, pushkatuar e internuar mijëra njerëz. Ai regjim kërkon të kthehet në Shqipëri. Nuk e kanë shkruar por e kanë në mentalitet e veprimtari. Në këtë pikëpamje dhe shoqërimi i z. Bylykbashi është në përputhje me mentalitetin e tyre. Bile nuk do ishte çudi ta çonin në Spaç ose ndonjë burg tjetër e të internonin familjen. Ka shkelur ligjin e komunizmit. E kanë thirrur për agjitacion e propagandë. Është e turpshme. Nuk ndodh në asnjë vend të botës. Është rast unik. Në Shqipëri po përsëriten ngjarjet e pas vitit 1945. Një sinjal alarmi. Në Shqipëri po zhvillohet një grusht shteti. Në Shqipëri nuk ka Gjykatë Kushtetuese, nuk ka të Gjykatë të Lartë. Gjykatat e Apelit po rudimentizohen, nuk funksionojnë gjykata e faktit. Kemi një kolegj zgjedhor që dha dje një vendim skandaloz, me urdhër. Kemi një proces që kërkon të bëhet në kundërshtim me dekretin e Presidentin. Kemi një sërë veprimesh në kundërshtim me ligjin, në kundërshtim me Kushtetutën. Ka vetëm një mënyrë për t’i mbrojtur. Një lëvizje masive popullore. Një pjesëmarrje e gjerë e masave për t’iu kundërvënë diktaturës. Unë besoj tek metoda demokratike. Sot rrezikohet pluralizmi”.
