Pak ditë më parë, disa nga akset kryesore të Vlorës janë përmbytur nga reshjet e shiut duke vështirësuar lëvizjen e banorëve por edhe qarkullimin e makinave.
Përmbytjet shkaktuan përplasje edhe mes kryetarit të Bashkisë, Dritan Leli dhe ish-kryebashkiakut Shpëtim Gjika, i cili u “godit” nga televizioni i vëllait të Dritan Lelit, për lejimin e ndërtimeve të larta, që ishin edhe një nga shkaqet pse Vlora përmbytej.
Gjika, përmes një postimi në “Facebook” ka reaguar ashpër ndaj kryebashkiakut aktual.
“Sot e mësova që, “struci”, vetëm këtu në Vlorë dhe jo gjetkë, e fshehka kokën dhe nxjerr bythën zbuluar, jo kur i kanoset rreziku nga kafsha grabitqare, por kur u mbytka në ujë. Zanati thonë, o mësohet qysh vitin e parë, kur ke vullnet, pasion dhe dëshirë, ose në të kundërt, jo që nuk bëhesh dot usta, por për fat të keq, ngelesh çirak edhe po të mbajtën në punë për sevap edhe 4 vjet të tjera”, shkruan Gjika.
