Shkrimet raciste të disa mediave serbe bënë bujë ditën e djeshme, pasi konsideronin zjarrin në Notre Dame një “mallkim dhe dënim nga Zoti” për shkak të valëvitjes së flamurit të Kosovës brenda katedrales gjatë shënimit të 100 vjetorit të përfundimit të Luftës së Parë Botërore, në nëntor të vitit të kaluar.
Kanë qenë mediat online “Informer” dhe “Alo”, të cilat shkruanin se Francën e “arriti dënimi i Zotit. Para gjashtë muajsh valuan flamurin e shtetit të rrejshëm të Kosovës në Notre Dame. Tani po e shkatërron furia e zjarrit”.
Lidhur me këto shkrime raciste, ka reaguar ambasadori francez në Beograd, Frédéric Mondoloni, i cili i cilësoi ato skandaloze, ndërsa shtoi se ndjen vetë neveri për njerëzit që thonë të tilla gjëra.
“Komentet negative më kanë prekur thellë dhe kam vetëm neveri për njerëzit që thonë gjëra të tilla”, u tha gazetarëve në Beograd ambasadori francez. Të dyja mediat më pas i tërhoqën shkrimet e tyre që shkaktuan shumë reagime.
Zyrtarët serbë dhe një pjesë e medies nuk e kanë tejkaluar ende zemërimin me Francën për shkak të trajtimit të Kosovës në manifestimet me rastin e përvjetorit të përfundimit të Luftës së Parë Botëror, që u mbajtën në Paris më 11 nëntor të vitit të kaluar, shkruan VOA. Presidenti i Kosovës, Hashim Thaçi ishte i ulur pranë udhëheqësve më të rëndësishëm botëror, madje afër edhe presidentit rus, Vladimir Putin, ndërsa presidenti serb, Aleksandër Vuçiç, ishte ulur në anën e kundërt.
