Organizata Botërore e Shëndetësisë ka shpallur emergjencën botërore për shkak të koronavirusit. Në Kinë deri tani raportohen 427 të vdekur dhe mbi 20 mijë të infektuar. Frika dhe paniku është përhapur në mbarë botën dhe të gjithë janë në pritje të shpikjes së vaksinës. Efektet negative të virusit janë ndjerë edhe në ekonomi. . Rënia e prodhimit, rënia e bursave dhe frika për një epidemi globale, duket se ka ndikur në tkurrjen e tregjeve ekonomike.
Megjithatë, sipas raportimeve ka një sektor që po lulëzon në gjithë këtë fatkeqësi. Është pikërisht sektori i lojërave elektronike.
Që pas vendosjes në karantinë të 20 qyteteve, shumë kompani lojërash kanë pasur një “boom” përdoruesish nëpër platformat e tyre.
“E përdor telefonin vetëm tri orë në ditë kur jam në punë, por së paku tetë orë në ditë gjatë Festivalit të Pranverës, sepse dita është shumë e mërzitshme”, tha Lu Zhang, mësues në një shkollë të mesme në provincën Shadong.
Sipas “Reuters” vlera e aksioneve të kompanive të lojërave elektronike është rritur me 2% gjatë këtyre ditëve. Rritje shënuan edhe platforma Bilibili, makina kërkimore Baidu dhe gjiganti i tregtisë elektronike, Alibaba.
