Shteti ka degraduar, aq sa njerëzit i dinë kriminelët dhe flasin gjithë ditën nëpër kafe. Ky është vlerësimi i dhënë nga gazetari Denis Dyrnjaja, teksa ka qënë i ftuar në “360 Gradë”, në “Ora News”. Ajo që është më e rendë, lidhet me faktin se grupet kriminale dihen nga njerëzit, por policia nuk i arreston. Duke hedhur poshtë statistikat që ka publikuar Rama, gazetari i mëshon faktit se shteti ka rënë.
“Kryeministri thotë se statistikat që kam unë, janë më të mira se statistikat e qeverisë së mëparshme. Nuk është çështja që krimi të matet me statistika.
U vranë 5 herë atëherë, u vranë 3 tani. Nuk maten jetët njerëzore me statistika. U vranë 5 atëherë dhe 3 sot, kjo është skandal. Kjo puna e statistikave me humanët duhet të marrë njëherë e mirë fund.
Situata perceptuese e krimit është e rëndë. Në qoftë se duhet që të reagojë në mënyrë institucionale, qeveria duhet të veprojë menjëherë. Grupet kriminale janë të njohur. Njerëzit i dinë dhe flasin gjithë ditën nëpër kafe. Si ka mundësi që policia nuk i di. Këtu ka falimentuar shteti. Dhe pse është falimenti i shtetit? Është pyetja retorike, sepse ka 1 mln përgjigje”.
