Pak ditë më parë, nafta dhe benzina shënuan një tjetër rekord historik, duke ndikuar tek buxheti i familjarëve dhe bizneseve. Por rritja e çmimeve duket se nuk do të ndalet me kaq, pasi është reflektuar edhe tek ushqimet. Shqiptarëve u kushton shumë më shtrenjtë shporta e produkteve bazë.
Njësitë e tregtimit më pakicë, kanë nisur të reflektojnë rritjen e çmimeve për të gjitha produktet, që së fundmi i kanë blerë më shtrenjtë. Mielli është rritur nga 20-35 lekë për kg, gjë që ka sjellë edhe rritjen e çmimit të makaronave në 10-20 lekë për pako apo të nënprodukteve të tjera. Qumështi vendas dhe i importuar po ashtu ka pësuar rritje 15-20 lekë për shishe.
Sheqeri është rritur me 10-15 lekë për kilogram, vaji vegjetal është rritur me 20-40 lekë për kg. Po ashtu, rritje ka pësuar edhe orizi me 20-30 lekë për kg si dhe uji i cili është prodhim vendas dhe që ka një rritje me 10-20 lekë/shishja.
Por çfarë ndodhi që çmimet u rritën menjëherë? Kjo ka të bëjë me luftën Rusi-Ukrainë dhe tronditja e zinxhirit të tregjeve ndërkombëtare. E para që ka reflektuar çmim më të lartë ka qenë nafta, për shkak të rritjes së vazhdueshme të çmimit për fuçi në bursë.
Ndërkaq, varësia nga Rusia për drithërat e bukës por edhe për produkte të tjera si orizi apo vaji vegjetal, kanë sjellë rritjen e çmimeve në vend. Tregtarët me pakicë shprehen se janë të detyruar ta reflektojnë tek konsumatori, për shkak se furnizimi i marrë së fundmi është shumë më i shtrenjtë.
