Një kontigjent afganësh pritet të vijnë gjatë orëve në vijim në Shqipëri, ku dhe do të strehohen përkohësisht. Ministri i Mbrojtjes, Niko Peleshi, ka komentuar vendimin e qeverisë për strehimin e një grupi afganësh në vendin tonë, duke theksuar se ne si vend anëtar i NATO-s kemi përgjegjësinë për të ardhur në ndihmë në kriza të tilla.
“Ne jemi pjesë e mobilizimit për të përballuar pjesën tonë në këtë krizë, dhe duhet që të mirëkuptojmë gatishmërinë tonë për të marrë pjesën e ngarkesës që i takon dhe ky është rasti për pritjen e një pjesë të afganëve, pasi vendi i tyre është në trazira. Shqipëria ka pranuar dhe duke u ngritur në lartësinë e përgjegjësisë që do të presim një kontigjent të grupit të afganëve”, u shpreh ministri Peleshi.
Ministri ka përcjellë detaje në lidhje me një shtetase shqiptare që ndodhet në Afganistan, ku theksoi se janë në bisedime për riatdhesimin sa më parë të saj. Ai u shpreh se shqiptarja punonte në Afganistan për një organizatë të huaj, ndërsa po bëhet çështë e mundur për riatdhesimin e saj në vendin tonë.
“Një shtetase shqiptare punonte atje për një organizatë të huaj, dhe kemi pasur informacion nga familja dhe po bëjmë gjithçka duhet për të bërë dhe riatdhesimin e saj në vendin tonë”, është shprehur Peleshi.
