Një tjetër familje e rrënuar, e cila jeton në kushte ekstreme të varfërisë është vizituar nga kryeministri Rama. Ai ka vizituar shtëpinë e Ilir Koçit, në Marikaj të Vorës. Teksa është pritur mes lotëve të familjarëve, të cilët kanë shtrirë duart për të kaluar këtë varfëri që i ka mbytur, Rama u ka dhënë fjalën se gjithçka do ndryshojë.
Në bisedë me familjarët, ata nuk hezituan të theksonin punën e pakursyer të “Fundjavë Ndryshe”. Në po të njëjtën linjë qëndroi edhe kryeministri Rama, i cili nënvizoi se “Fundjavë Ndryshe”, është një burim frymëzimi për të, e për këdo.
Gruaja– “Ndihmë kam kërkuar. Jemi lidh edhe me Fundjavën”
Rama-“Ata janë shumë të mirë. Edhe meritojnë respekt të madh. Janë burim frymëzimi edhe për mua, edhe për ne. Ne kemi filluar të bëjmë bashkëpunim me ta. Do ndërtojmë së bashku një qëndër të madhe për ndihmat, për njerëzit në nevojë. Qëndrat e emergjencat do ti transformojmë, do ta bëjmë shumë të bukur për ta. Por gjithmonë do të jetë nevoja më shumë se mundësitë”.
Kryefamiljari punonte në ndërtim, sa herë i jepej mundësia. Familja e cila jeton në varfëri ekstreme, në një barake të rrënuar, së shpejti do të shohë lumturi. Rama i premtoi një punë kryefamiljarit, për të mbajtur frymën e fëmijëve. E po kështu edhe ndërtimin e shtëpisë, e cila të ngjante me një barake të braktisur.
